Suliffitsinni ulloq uippakajaarluta aallartipparput. Ullaaq taanna qulakkeerparput danmarkimi igasoq tusaamasaq Casper Sobczyk Brugseni suleqatigalugu sisamariarluni igasoq filmiliussallutigu.
Casper Sobczyk brugsenimiit aaqqissuussamut Unnuk Mamarsaaffik-mut igaqataasussatut tikisinneqarpoq. Tikinnginneranilu paasitinneqakannerpugut ajornanngippat igasoq filmiliussagipput, ullorli sunaassanersoq, sunilu qulakkeerneqarani.
Taakku videoliassat brugsenip nittartagaani facebookianilu takuneqariaannanngussallugit suliassaapput.
Unnuk Mamarsaaffiup pinngilaataa Casper suleqatiga peqatigalugu kalaalimerngit assigiinngitsut usserarpai, neqiillu nunatsinneersut assigiinngitsut iganissaminut toqqartorpai, tassanngaallu igaassanik eqqarsalerluni.
Unnuk Mamarsaaffik qaangiummat nalornikannerluta susoqassanersoq, naak tusakannereeraluaripput ulloq taanna igasoq filmiliorsinnaallutigu, sumiiffissarli qulakkeernagu. Paasitinneqarpugut brugsenip igaffia inissaqanngimmat, nammineq eqqarsarluta igaffissaanik ujaasisariaqarluta. Siullermik sulisut ilaat igaffiat atorsinnaanerigut aperigaluarpugut, itigarlutali. Brugsenip assiliisarfiani igaffissamik sanapallakkarluarpugut, paasilluguli igaffigissallugu tulluarnavianngitsoq.
Igasorlu Casper aqaguani aallassammat, ulloq taannarpiaq kisiat filmiliorsinnaavugut.
Annakannajaartilluta eqqaavara Brugseni Natalie, pisiniarfik nutaaq inissaqarluartoq, immaqaliaa pisiniarfiup iluani, neqaarniap eqqannguani igaffinnguamik pilersitseriarluta tassani igasoq filmiliarisinnaallutigu.
Telefoni tigoriarlugu pisiniarfiup ittua sianerfigaara, akinngilarli. Pisiniarfiup neqaarniaanut sianiinnarpunga, oqaluukkakkuku isumassarsiamut akuersaarluni nipeqarpoq.
Atortut piareersarneri
Tassami, atortut tamaasa tigoriarlutigit Nataliemut igaffissaq inissikkiartupallapparput.
Tuaviinnaq piareeratsigu filmiliornermut atortut uku piareersalerpagut: Filmiliutit, qulleq, mikrofoni, filmiliortarfimmullu assersuutit.
Filmiliutit marluupput.
- Filmiliut pingaarneq: Canon R5, 4K-mik C-log atorlugu filmiliortillugu. Taanna stativimiitiinnarlugu uninngatillugu filmiliortipparput.
- Filmiliuutip aappa: Nikon Z50ii 1080p-mik N-log atorlugu filmiliortillugu. Taanna filmiliut uanga paarivara, igasup igaavi qanillillugit filmiliorsinnaajumallugit.
Igasoq takkummat ingerlaannangajak igasinnaanngorpoq. Ikiortini akussanik piareersaatipallappaa, piareermallu mikrofoni atiteriarlutigu filmiliaralugu aallartipparput.
Filmit sisamat 3-8 minutsinik sivisussusillik filmiliorpagut, atortutigut ajutooruteqarata. Piffissaq sukkasuumik ingerlavoq, qangaammalli videot sisamat tamakkerpagut.
Suliaq uippakajaartumik aallartittoq ajunngeqisumik naammassimmat atortut poortoriarlutigit suliffitsinnut naammagisimaaqaluta uterpugut.
Videomik killuineq
Suliassalli tullia sivisunerusussaq tassaavoq: videomik killuineq.
Videot isiginnaarukkit qanoq suliaasimanersut takusinnaavatit. Aallartinnerani brugsenip aamma casperp logoi nuisinnerini suleqatigiinneri effektimik krydsiliortumik takutippara. Tulliani igaassaasa atii, kalaallit qallunaatullu. Videomi filmiliutit tulleriissaarpakka pisoqarnerit assigiinngitsut aallaavigalugit. Pissanganartumik oqaaseqaraangat filmiliut qanillillugu, igaani akooraangamigit filmiliut igaavinut sammisoq nuisittarlugu. Oqalunnerata nipaa AI atorlugu immikkoortippara, filmiliutillu aappaaniit avatangiisip nipaa, igaallu siarpalunneri immiullugit, kisiannili casperp oqaluppalunnera AI atorlugu peerlugu, nipaa filmiliutit marlunniit immiussaq tusaaneqannginnerussammat.
Kingornalu videot ataatigut kalaallisut allagartalersorpakka.
Videot sisamaapput, neriuppunga tamaasa takujumaarisi, minnerunngitsumillu iganeri malillugit igajumaartusi, igaavimi mamarluinnarput!
Ugguuna aamma suleqatinnut pikkorissunut, filmiliornermut ikiuuttunut Ivalu Petersen-nimut Kasper Dyrberg-imullu qujarusuppunga.
Takanna!
