Ukioq 2017-imi ukiut tallimat ilinniartitsisutit ilinniagara atorlugu sulereerlunga stressimik nakkarujussuarpunga. Taamani stressi aatsaat misigigakku sakkortunaavillugu misigaara.
Sisimiuniit nuummut nuunnerput pikkunarpoq, taamanilu paasivara imminut annaatissaguma nuummi ilinniartitsisutut suliinnarsinnaanngitsunga.
Isumaqarniaqinak ilinniartitsisutut sulinera tamaat ajortumik ingerlasimasoq. Sisimiuni atuartut nuannerluinnartut pillugit ilinniartitsisuuvunga, nuummullu nuuleratta assut taakku ungagigaluaqaakka. Aasaq atuarfik naammassillugu soraarummeermata ullaakkut itersarluta sianerfigivaatigut, nuannersumik eqqaamammatigut assut qujarutigeqaara.
Taamani suliffima saniatigut assiliineq ilusilersuinerlu ingerlataraakka. Qangarsuarlimi paasivara assinik, grafikkimik, nipinillu suliaqarneq nuannaralugulu pikkoriffigigiga. Taamaammat nuummut nuuleratta nalunartut pillugit mediegrafikeritut ilinniarnissara saniatigut qinnutigaara, Tele Greenlandimi praktikkerfissarsereerlunga. Pissutsit ajunngitsumik ingerlasimappata ilinniartitsisutut sulinera immaqa ingerlaannarsimassagaluarpoq, pissutsilli taamani taamaammata aalajangerpunga mediegrafikeritut ilinnialissallunga.
August 2017-imi aarimmi danmarkimut kisima aallaannaqaanga, nalullugu susoqassanersoq, qaqugulu uteqqissanerlunga. Taamani meeqqat mikinerugallarmata assut ungavunga, sivisuumimmi takoqqinngikkallassallugit misigissutsinnut sakkortummat.
Aarhus Techimi 30-nik ukioqarlunga ilinniarnera aallartikkakku atuaqatikka tamangajammik assut uannit inuusunnerupput, 16-niit 21-t tungaanut ukiulippassuit, ataasiakkaalli uattupajaaq ukiullit. Imminulli ajukkunnanga suliarisassakka peqqissaarullugit suliarisarpakka, asuliinnarmi ilakka qimallugit danmarkimut ilinniariannginnama, akisussaassuseqarluarlunga takutisilluarusullunga suliakka inernerissumik naammasserusuppakka. Suliarami aamma nuannarigukku, suliakkalu aamma nuannarineqassappata pimoorussinermik takutitsisariaqarama, suliammi kusanartumik inernilikkat siunissami sullitassanniit aamma takuneqarataannaammata.
Ukiut sisamat affarlu mediegrafikeritut ilinniarnera ingerlappara. Ukiullu taakku ingerlaneranni praktikkerfikka ukuupput: Tele Greenland, ReneDesign ApS (ullumikkut RD Marketing Bureau), kiisalu Kalaallit Nunaanni Brugseni (massakkut suliffiga).
Praktikkernerup saniatigut Aarhus Techimut atuariartullattaavunga. Atuarninnilu misilitsinnerpassuit pipput, pimoorussinermalu peqqutaanik angusarissaartarlunga. Tamanna asuli nittarsaassutiginianngikkaluarpara, oqariartuutigiinnarusulluguuna suliat assut nuannarigaanni peqqissaarneq aamma nammineq pilersarpoq, sulianut tiguartinnarluni, tamannalu atuagarsornermi iluaqutaaginnartarluni.
Maanna ilinniarnerma naammassineraniit ukiut tallimat qaangiutereersut ulapillunga sulisaraluarlunga ilinniartitsisuuninnituut stressi misigeqqinnikuunngilara. Tassunga takussutissaasimassaat suliakka nuannarilluinnarikka, imaaliallaannarlu iperariaannaajumaarnagit.
Aajuku Aarhus Techimi ukiuni sisamani affarmilu atuarninni suliakka aalajangersimasut takutikkusutakka, neriuppunga soqutiginnillutit isiginnaarsinnaassagitit.
Hello! This is the Gutenberg block you can edit directly from the WPBakery Page Builder.
