Kalaallit Nunaanni Brugsenimi suliama ilagaat pisiniarfiit silatii iluilu isikkui kusassassallugit, pisinianullu ajornannginnerulernissaat anguniarlugu isikkulersussallugit.
Brugseni Natalie juni 2025-imi ammartoq siullersaalluni brugsenip isikkuanik nutartikkamik isikkussaanik ilusilersuisutut akisussaaffimmik annerpaamik paarsillunga ilusilersorpara. Naak piffissaq sivikippallaartoq atorlugu isikkussaa suliarigakku inernera suli naammassivinngikkaluartoq angusara assut tulluusimaarutigeqaara.
Siullermik pisiniarfiup ilua qiviarutsigu allannguutini annersaat tassaapput iikkat naasusanik qallikkat, allaqqasunillu qullilikkat, brugsenip skrifttypiani aappiuttartoq Sadey Ann atorlugu. Miamimi Adobe Max peqataaffigigakku takusakka isumassarsiffigilluarlugit Brugseni Nataliemut atorpakka.
Naasuusat qulliillu naatitaarniarfimmi imigassaarniarfimmilu atorput.
Taava allannguutit annersaata ilaat tassaavoq iikkat imminnut tulluartunik qalipaatinik qalipatsinneri. Brugsenip qalipaataa aappalaartoq isinut sakkortusinnaasoq tamatumuuna taarsitilaarlugu sakkukillillugulu iikanut ilaanut qalipaatinngorpoq, qasertoq aappalaartumik tulluartoq ilanngullugu. Pisinianut qalipaat maanna sakkortuallaarunnaarluni takujuminarnerulerpoq. Qalipaatit taakku mamartuliani neqaarniartumilu annersusumik atorput.
Pisiniarfimmi pisiassat immikkoortortaqarfii pisinianiit aamma ujaruminarsarniarlugit skriftyperput pingaarneq Serenity naqinnernik 3D-jusunik angisuunik allannilerlugit pisiassat nikitertussaanngitsunut aalajangersimasunut nivinngaassorput. Tamaat isigalugu, naasuusat allaqqasunik qullillit, iikkat qalipaataat, naqinnerillu 3D-jusut silittut ataatsimut isigalugit imminnut assut tulluarput, ullutsinnullu ilusaat naleqquteqalutik.
Nammineq akiliisarfik aamma immikkut isikkussaa Brugseni Nataliemut atuuppoq. Isikkoq taanna Brugseni Qinngorput-mi siullermeerluni atuutilerpoq. Kisiannili nataliemi akiliisarfiup eqqaa iigaqanngimmat isertarfiata qulaatungaani pvc plade atorlugu oqariartuutaa illuttut takutissinnaanngorlugu nivinngarparput, isikkualu pisiniarfiup isikkuanut sinneranut aamma tulluaqaluni.
Pisiassat immikkoortortaqarfii pisinianiit aamma naniuminarnerussappata immikkut silarsuaaralerlugit, tassa immikkut isikkulerlugit immikkoortikkuminarnerussapput.
Piffissaq sivikitsoq atorlugu pisiniarfiup iluani ilusilersuininni eqqarsaatersuutikka arlaqarput. Siullermik pingaartippara pisinianiit pisiniarfik iserlugu nuannersuunissaa aamma pisiassat sumiinnersut ajornannginnerusumik nassaarineqarsinnaanissaat.
Ullutsinnimi inuit ulapittumik inuuneqartuusugut, suliffitsinniit soraaraangatta pisiniarfiliarnissaq ulluinnarsiutigigajupparput.
Isummanni aamma ulapikkaanni iserfiit nuannersuuppata eqqarsaatikkut arlaatigut eqqissisaataasinnaasut eqqarsaatersuutigaara. Brugseni Natalie arlaatigut angerlannginnermi aamma pisiniarfiutigaluni eqqissisarfittut takorloorpara, tamannali pisinianiit pingaarnertut nalilerneqarumaarpoq.
“Liminal space” taaguut inuup eqqarsaatikkut ineriartorfiattut, imaluunnit aqqusaagassatut oqaatigineqartarpoq. Tassa imaappoq piviusumi imaluunniit sinnattumi sumiiffik, misigissuseq aalajangersimasumiit misigissutsimut allamut ikaarsaarfittut aqqusaagassaq. Tassa tuluttut taallugu “in-between” imaluunniit “threshold space”. Tassa ulluinnarni ulapilluni pisiniarfiliaraanni angerlannginnermi pisiniarfimmi misigissutsit eqqissinermut pisinnissai annerusumik minnerusumilluunniit sunnerniarlugit ilusilersuininni pingaartippara.
Taava silataani igalaanut foliet nioqqutissanik assitallit aamma pisiniarfitsinni nutaajupput. Igalaarpassuit siunertaqarpallaaratik inissisimasut, pisiassanut ilioraaviit aamma nillataartitsivissuit tunui silataaniit takuneqarsinnaasut taakkuninnga igalaanut folienik qallertippakka.
Foliet ilusilersunnginnerini nioqqutissarpassuit assiliisarfimmi piffissaq sivisooq atorlugu qulaaniit assileqattaarpakka, pingaartillugu kusanarpata pisiarineqarusunnersunissaat. Inerneralu ajorisassaanngivissortumik nalilerpara, tunuliaqutaami qasertoq pisiniarfiup iluani iikkanut aamma atulereeratsigu.
Naak Brugseni Natalie siullersaalluni taamatut nutaaliaasumik isikkulereeraluartoq suli naammassivinngilaq, isumassarsiakkalu alla suli inerisaataasussa pisiniarfimmut tutsinnissai qilanaareqaara. Isikkussarlu taanna sinersissatsinni brugseninut allanut aamma siaruarnissaat qilanaaraara.
Nuummiikkuit Brugseni Natalie pisiniarfiginissaa kaammattuutigaara, brugsenimmi pisiniarfiutaani maanna kusanarnerpaagallarpoq.
