Assiliinermik ilusilersuinermillu soqutiginninnera maniitsumi inuusuttuaraaninniilli pilerpoq. Analogimik assiliissuserlunga pisut assilisarpakka, taamanilu suliffinni nammineq nipilersuusiatta CD-ata saqqai ilusilersortarpakka, plakatiliorlunga, nittartagaliorlungalu.

Aqqalu Augustussenimik ateqarpunga. Maniitsumi peroriartorpunga, nuummilu massakkut najugaqarlunga. Nuliaqarpunga, marlunnillu meeraqarlunga.

Mediegrafikeritut ilinnialinnginninni ilinniartitsisutut naammassivunga, ukiunilu tallimani ilinniartitsisutut ilinniagara atorlugu sulillunga. Inuusuttuaraaninniilli soqutigisara aallukkusullugu kingorna aalajangerpunga, Aarhusimilu mediegrafikeritut ilinniarneq nunatsinni praktikkernertalik ukiuni sisamani affarlu ingerlallugu.

Massakkut mediegrafikeritut ukioq 2020-mili naammassereerlunga Kalaallit Nunaanni Brugsenimi atorfeqarpunga.

Taamaammat aamma paasitissavara Tappiut Design Studio-mi ingerlatsinera suliffima avataani ingerlakkakku.

Mediegrafikeritut soqutigisakka ukuupput: Assiliineq, ilusilersuineq, videoliornerlu. Assullu nutartertuarnissara, ilisimasanik nutaanik pissarsinissara, periuutsinillu nutaanik ilikkagaqartuarnissara pingaartillugu. Taamaammat ukioq 2023-mi aamma 2024 Adobe Max ulluni pingasuni ingerlanneqartartoq peqataaffigaara, siullermik Los Angeles-imi, aappassaani Miami-mi.