Takorloorsinnaassagunarpat tuttunniarnermi assiliivimmik nassarnissaq pisariussasoq.
Taamaammat tuttunniaraangama assiliissutikka nassarneq ajorpakka. Kaasarfimmiussamik assiliissummimmi nassartuaannarpunga, tassa iPhonera.
Septembarip qaammataani qiianarsinnaasumi kammaga Kitdlaq Jørgensen ilagalugu pisukkaangatta nassatakka ukuugajupput:
- Nammattagaaraq 3-5 literi, imerfittalik
- Nerisassamerngit ullup affaanut naammattut
- Aallaat, patronissamaatillu
- Alersissamaatit
- Aaqqatit
- Savik
- Nammaat
- Eqqiluisaarutillu
Pisukkaangatta sapinngisamik nassatagut oqinniartittarpagut, sivisuumimmi pisunnitsinni qasusaatiginaveersaassagatsigit, tuttukkuttalu utimut nammannitsinni aamma qaavatigut oqimaaqutinissagatta. Taamaammat assiliissut nalinginnaasoq nassassallugu inissaqanngitsoq oqaatigiuminarpoq.
Qujanartumilli ullutsinni mobiilit assiliissutaat imak pitsaatigipput, allaat Raw-inik assinik suliarilluarsinnaasunik assiliisinnaalluni, aamma amerlasuunik lenseqarsinnaalluni. Assilisai naammaginartaqaat.
Ullaaralaakkut iteraangatta sila suli taartarpoq, ungatitsinnili seqerngup qaamanera malunnarsilaalereersimalertarpoq. Ullorissat suli ersarittut iPhonema assiliissutaa pingaarneq atorlugu umiatsiami aalalaartumi 10 sekundit uninngalluarlunga assilivakka, inernerilu ajorisassaanngeqaat. Qaammalaalereersoq pisuleraangatta qaamaneq suli annikikkaluartoq iPhonema assiliissutaa pingaarneq, RAW-imik assiliinermi 48MP-usoq qaamanermik katersilluarsinnaanerusoq aamma atortarpara. Ukunanilu assini siullerni taassuminnga assilisakka takusinnaavatit.
Pisunnermi unillatsiaqattaarneq pinngitsuugassaanngilaq. Tassa qaallorissumi tuttunik qinngusersaaraangatta assilisassaqqissumik takugaangama periarfissatsialaq atorlugu iPhonera kaasarfinniit ammuteriarlugu assiliisarpunga. Tassa taanna iPhonep pitsaaqutaa, kaasarfimmiit amoriaannaammat. Allaat imak ajornanngitsigaaq, assileqqammerluinnagara Lightroom App atorlugu preset ikkukkaangakku ingerlaannaq assilisama isikkussaa tamatigoortoq isikkorilertarpaa, kinguninngualu attaveqarutta Facebook aamma Instagram Storymut ikkuttarpara, inuinnu aatsaarluinnaq assilisara takoriaannaasarpaat. Tamassumalu sivisussusaa sivisunerpaamik immaqa 2 minutsiusarpoq.
Ilaanni aamma assilerusutakka ungasissumiittut iPhonema assiliissutaa qanillisaatilik atorlugu assilisarpakka. Qanillisitsinera killeqaraluartoq naammagittaannartarpunga. Norraq kisimiittoq uagutsinnut qaninngoortoq assilivara, tuttulli ungasissumiittut assilerusuttaraluarpakka, tamannali maanna ajornarallarpoq.
Soorunalimi assiliinissaq aavarninni pingaarnerpaatinneq ajorpara. Kisianni aamma aavarneq nuannersoq puigukkiunniarlugu assiliisariaqartarpunga, siunissami misigisat nuannersut kingumut qiviaqqittuaannarniassagakkit, ilagisannullu takutillugit, misigisagut kingumut eqqaaqqittarniassagatsigit. Uannulli assiliisartutut assit pitsaasuunissaat pingaaruteqarpoq.
