Aasami juli 2024 ilaqutariiulluta Frankrigip kujataanut, tassa ulluinnarni taasartagarput Fransk Rivera imlt. franskisut Côte d’Azurimut sap. ak. marlungajaat feriarpugut.
Ilaqutariiulluta nunanut kiattunut aasami angalaneq assut nuannaraarput, aasarnissaanullu tamatigut feriarnissarput pilersaarusioraangatsigu nunat kiattut marsertuaannarpagut.
Unalu peqqutaavoq; ukioq naallugu nunatsinni qiianartumi inooreerluta kiattorsiorniarluta angalarusuttaratta.
Frankrigit kujataani illoqarfiit ukua tikippagut:
- Cannes
- Menton
- Monaco
- Nice
Tikikkatta mittarfimmiit halv timengajak pisulluta qimuttuitsut unittarfianukarpugut, Nice-miit Cannes-imut qimuttuitsorniarluta.
Qimuttuitsut kinguaattoorlutik takkummata assut inuttupput, tattoqeqalutalu arriitsumillu ingerlalluta Cannes-imut 1 tiimingajak ingerlaareerluta tikippugut.
Cannes illoqarfiuvoq filmiliornerup silarsuuani tusaamasaq. Ukiut tamaasa maajimi nunarsuarmi filmit pillugit festivalini akimanerpaaq Cannes Film Festival ingerlanneqartarpoq, pisumilu tassani festivaali filmiliaritittartunik tusaamasaniit tikerarneqartarpoq, filmillu nutaat takutinneqaqattaartarlutik.
Cannes illoqarfik assut kusanarpoq, takuneqariaannaavorlu inuit aningaasaateqarluartuniit tikerarneqarluartartoq, biilimmi akisoorsuit soorlu Ferrari Lamborghinillu aqqusinermi assut takussaapput. Sissaami aamma umiarsuit yatchit arlallit tulanngapput. Illoqarfittaani pisiniarfippassuit tamanut naleqquttut, ilaalli akissaqarluarnernut naleqquttut takussaapput, kiisalu neriniartarfippassuit nunarsuatta nerisassaannik assigiinngitsunik sassaalliisartut.
Sissaa takisooq kusanartunik sungaartunik sioraqarpoq, naluffigalugu assut nuanneqaluni. Cannes-imi malunnarpoq inuit eqqissiivillutik aasarsiortut.
Cannes-imi assilisakka ukuunerupput: Sissaq, orpiit palmit, illoqarfiullu kusanassusaa. Illoqarfimmi takusat allakkanut postkortinut eqqaanaqaat, taannalu eqqarsaatigalugu assiliiniartarpunga.
Qalipaatit arlallit assiliuminaqaat, pingaartumik tungujortut aappalungusersullu (orange). Taamaammat assilisakka kissalaartumik isikkoqarnerupput. Tassa imaq akullersuarmi (middelhavet) qalipaatit takugajukkagut.
Ullut tullii frankriigip italiallu killeqarferpiaani illoqarfik Menton najorparput. Illoqarfimmi tassani inuuneq Cannes-imut naleqqiullugu eqqissisimaneruvoq, aatsaat tassa eqqissilluta ullugut ingerlasinnaapput, angumeriniagassat alakkagassallu eqqarsaatigivallaarnagit. Mentonip illoqarfia allatulaaq isikkoqarpoq. Illui italiamiut illulioriaasaannut assingupput, qangami 1800-kunni illoqarfik italiamut atasimammat. Aqqusineeqqat amitsut, illunullu isaarissat majuartarfikkaat ilaanni najugaqarpugut, italiamut isikkivilerluta. Inerput mikisunnguuvoq, assullu alutornarluni.
Mentonimi illoqarfiup aqqusineerai illuilu assiliuminarput, kiisalu mentonnip illoqarfia, qaqqarsuit portusuut aterpiaani inissisimasoq.
Mentonimiit akunneq ataasiunngitsoq atorlugu Côte d’Azurip illoqarfianut annerpaamut Nice-mut ingerlaarpugut. Nice illoqarfissuummat assilisakka ikinnerupput, sapinngisamilli immikkuullarequtai soorlu sissaq tuapaannalik assililluarniarpara.
Nice-miit ornitassat allat qanittut ulluinnarlugit orneqattaarpagut. Pingaartumik illoqarfeeraq qanittunnguaq, Villefranche-sur-Mer sissarissoq nalukkiarfigisaqattaarlugu.
Illoqarfeerannguup inissisimaffia sivingalaarpoq, salliarnaqartiterluni. Tassani assiliuminartut aasit taakkuupput, aqqusineeqqat, sissaq sungaartunik sioralik, qalipaatillu tungujortut aappalungusersullu. Kusanaq.
Illoqarfeerannguup eqqannguani illorsuaq kusanavissoq katersugaasivittut atulernikoq Villa Ephrussi de Rothschild alakkarparput. Illorsuup eqqaani nunarsuup naatsiivii assigiinngitsut immikkoortitikkat pisuttuariarlugit katersugaasivittaa iserparput. Qaamaneq allanngoraqaaq, taartut qaamasullu sakkortullutik. Naatsiivinni assiliininni assit ersarlulaartutut, sinnattorpalaartutullu isikkulerniarlugit takorloorpakka, tamannalu iluatsilluartut isikkoqarsoraara.
Kiisalu Côte d’Azur-imiinnitsinni Monaco alakkanngitsuunngilarput. Monaco nuna namminersortuuvoq mikisunnguaq, inuillu aningaasaatilissuit najugaqarfigaaq. Monaco takusatsinniit allaaneroqaaq, illorsuimmi portusuut kusassarluakkat illoqarfimmi ersareqaat. Malunnarporli nutaaliat qangarpalaartullu akuleriisillugit illuliortitersimasut, ileqqutoqqanik pingaartitsinerat siumullu isiginerat ersareqaluni. Monacomi assilisanni atortutigut sipaannginnerup ersarequtai, tassa luksusi takutinniarpara.
Côte d’Azur naggammik tikinngikkipput qularutissaanngilat. Assiliisartutut maluginiagara pingaarnerpaaq unaavoq; Franskit imaq akullersuarmi ileqqutoqaat nutaalianut akulerunneri, iluatallunilu inuuniarneq. Neriuppunga assini tamanna takutilluarlugu.
