Aqqusinermi scootererpalaat, inuit qungujulasut inussiarnersut ulapeqisullu, nuna kiattoq takusassarpassualik, minnerunngitsumikku nerisassat mamarluinnartut. Tassa Bali ulloq manna taamatut eqqaamavara.
Julip 17-nianiit 30-ata tungaanut balimut feriarpugut. Bali Indonesiami qeqertaavoq angisoorsuunngitsoq, 5 millionillu missaani inoqarluni. Balip nunarsuatta qeqqatata kujataani inissisimavoq, silaannaalu kiattuulluni. Naak Bali julimi kiannerpaaffissaminiinngitsoq, tikitarput uagutsinnut kiappallaannginnera iluarusuutigeqaarput, kiassassusaami 25-32 gradit missaani inissisimasarmat. Balimi aatsaat uagut ukiuleruttornitsinni kiannerpaaffini angusarpaa, nunarsuummi affaata kujataaniikkami.
Cebastian Rosing suleqatigalugu Tappiut Design Studio assiliissutinik arfinilinnik Grønlandsbankenimiit tapiiffigineqarpoq, taakkulu assiliissutit pikkorissaasarnitsinni atugassiaassapput. Sulili pikkorissaannginnitsinni assiliissut ataaseq misilerarniarlugu balimut nassarpara.
Angalaninni assiliisarnissara pinngitsoorsinnaannginnakku assiliissummik lensinillu amerlanngitsunik nassarpunga. Ukioq manna assiliissut atugarisartakkanniit mikineq misileraatiginiarlugu nassarpara, tassa Nikon Z50ii.
Assiliissutip taassuma sensoria APS-C-juvoq, tassa sulininni atortakkanniit Full-framemiit mikineq. Assiliissutit taassuma sananeqaataa aamma mikineruvoq, oqinnerullunilu. Nikonip assiliissut taanna assiliisalerlaanut tulluarsarlugu sanavaa, kisiannili misilittakkakka aallaavigalugit assiliissut ukiorpassuarni assiliisartunut sulinermi atussallugu aamma pitsaasoq nalilerpara. Nikonip assiliissutiliaata pitsaanerpaap Nikon Z9-p piginnaasai ilai atugarai, soorlu autofocusia pitsaalluinnartoq, videoliornermilu eqaalluinnartoq. Minnerunngitsumik Nikonip assiliinermi qalipaatit ersersittagai tusaamasaatigisai ersersittarpai, suliareqqikkuminartut.
Nikon Z50ii-p sensoria pisoqaalaarpoq, uumasunillu assiliisartorpassuit ukiut qulit matuma siorna Nikon D500 saqqummermat sensori taanna atugarilerpaat, iluareqalugulu. Ilumoorlunga oqassaanga sensorit ukiorpassuarni siuariaataat iluamik maluginngilara, taamaallaat assiliissutini pitsaanerusuni akisunerusunilu, soorlu Z9 aamma Z8-mi stacked-sensoriusuna. Tamannali iluamik nassuiaateqarfiginianngilara.
Oqareernittuut assiliissut nassata assut oqippoq, inikeqalunilu. Lensit atukkakka akikitsuupput aamma inikeqalutik. Ukiorpassuarni ernumagisara APS-C sensori atorlugu assiliissagumi pisarnittut assilisakka taamak ersaritsiginavianngitsut Balimut angalaninni ilumuunngitsoq uppernarsarpara, tupaallaatigisannimmi assilisakka pitsaanaarpakka, taannalu eqqarsartaasera “Full-frame kisimi atorsinnaavara” ilumoorunnaarpoq.
Lensit nassatakka ukuupput:
- Nikon Z 16-55mm f/3.5-6.3 VR
- Nikon Z 50-250mm f/4.5-6.3 VR
- Nikon Z 40mm f/2
- Viltrox 25mm f/1.7 Air.
Lensit taakku akikipput, sialummullu illersuuteqaratik. Taamaakkaluartoq siallersumi assileerpiarneq ajorama naammagisimaarlunga atorpakka.
Nikon Z 16-55mm atorlugu assilisakka tamatigoornerupput. Aqqusinermi nunamilu pisut, minnerunngitsumillu ilakka.
Aqqusinermi inunnik, uumasunillu assiliininni lenseq 50-250mm atorneruara. Pingaartumik inuit ungasianiit assiligaangakkit assiligikka malugigunarneq ajorpaat, uanga assileeriaaserinnginnakku inuit qiviarsariarlugit aatsaat assilillugut. Peqqutai marluupput; tunuarsimaalaartuugama, kiisalu pisoq piviusoorpalaassappat taamatut assilisariaqarakku. Uumasuni tamanna ajornanngilaq, tunuarsimaarnanga qanorsuaq assiliisinnaagama.
50-250mm annertunerpaamik assiliisarninni atorpara.
Ilakka ilagitillugit soorlu neriniartarfinni 25mm aamma 16-55mm atorneruakka. 25mm-erimik assilisara qanillivallaarnagu, soorlu Full-frame atortillugu 40mm-erimik ilakka assilisinnaasarpakka, tunuliaqutaa ersernerluttumik takutillugu, takujuminarnerulaarlunilu assilisap avatangiisaa. Tassa 25mm-erip pitsaaqutaa, inunnnik assiliinermut pitsaammat, avatangiisermillu ersernerlutsitsilluni takutitaisarmat.
Nunamik imaluunniit sumiiffimmik assiliinermi 16-55mm-ri pitsaavoq, taannalu sissamiinnitsinni atullattaarpara.
Full-framemoortoq 40mm atorpianngitsuuippara, takorlooraluarakku ilakka portrætinik assilinerulaassallugit, kisianni 25mm-eri taakkununnga naammagiinnarpara.
Bali uannut nutaajummat assiliiffigalugu assut pissanganarpoq. Angalatillunga assiliigaangama misigisarpunga ulluinnarni pisunik assiliinissamut kajumissusineqqittarlunga, tamannalu balimi annertuumik misigivara.
Assiliissut nassatara nuannarinerulerlugu nunatsinnut uterpunga, assullu qilanaarivara pikkorissaatitsinitsinni peqataasunut atukkiunnissaa.
