Maniitsumi Assiliisa Photo Lab ingerlalluarluni naammassivoq. Peqataasut katillugit tallimaapput. Kissaatigigaluarakku amerlanerit peqataassasut, ukuli peqataasut soqutiginnilluarmata piffissaqarfigilluarlugit assiliinermut pikkorissarpakka.
Amerlanerit assiliineq ulluinnarni ingerlatarivaat, assiliissulli tamakkiisumik aqunnissaa ilikkarusullugu.
Taamaammat uani pikkorissarnermi assiliissut tamakkiisumik piginnaasai assersuutit atorlugit saqqummiuppakka, kiisalu assiliiniarnermi atortut pingaarnerpaat ataasiakkaarlugit misilerartillugit.
Pikkorissaaneq ulluni pingasuni septembari 24-niit 26-ata tungaanut ingerlavoq, sammisallu ukuupput:
- Ulloq siulleq: Assiliissut naqqaniit sammillugu, misilerarlugulu
- Ullup aappaa: Inunnik assiliinermi ilisimasassat, qaammaallattaatillu studiomi atortakkanik misileraalluni inunnik assiliineq
- Ullup pingajuat: Assinik aaqqissuinermi tunngaviusumik eqqumaffigisassat, mobililu atorlugu assinik aaqqissuineq
Pikkorissarnermi Assiliisa Photo Lab-ip assiliissutai tallimat, lensillu assigiinngitsut pikkorissartunut atorneqarnissaminnut periarfissaavoq, assiliinerup silarsuaani atortut qanoq assigiinngiiartigineri misiginiassammassuk.
Assiliissutit taakku Grønlandsbankip tapiineratigut atukkiunneqarsinnaalerput, taamaammat Tappiut Design Studio-miit Grønlandsbankimut qujaqqikkusuppunga.
Malunnarpoq peqataasut assiliisarnerminni siuariaateqarusullutillu ineriartortuarusuttut.
Qularinngilara pikkorissarnerup naammassereernerata kingorna assiliinermi piumassusermik nutaamik peqalertut, namminermi nalunnginnakku ilikkartinneqareernermi, assiliisartunillu allanik naapitaqareernerup kingorna piumassuseq nutaat takkuttartoq.
Aajuku peqataasut ilaasa akuersereernermikkut assilisatik ilai kusanaqisut ugguuna takutikkumallugit nassiussaat:
Pipaluk Johnsen
@ Pipaluk Johnsen
@ Pipaluk Johnsen
@ Pipaluk Johnsen
@ Pipaluk Johnsen
