Nalunngeriikkatsitut USA-p præsidentiata nunarput piumalluinnarpaa. Imak piumatigaa allaat sakkutuulersornikkut tiguarumallugu. Tamanna uagutsinnut najugaqavissunut ernumalluinnarnermik pilersitsivoq. Ernumanermi ulluinnatsinni malugillualerparput, allaat inuit arlallit nunatsinniit qimaarusullutik pilersaarusiulereerlutik.
Ernumanerli aamma ataatsimuulersitsivoq. Nunatsinni ataatsimuulerneq siornatigut uanga inuuninni taamak annertutigisoq takunikuunngisaannagara. Aatsaat taamak inunnik nunaminnut illersuisunik asannittunillu amerlatigisunik ataatsimut oqariartuuteqartunik takuvunga. Inuit 4.000-5.000 missaanik amerlatigisut ulloq 17. januar 2026 nuummi akerliussutsimik takutitseqataapput.
1970-ikkunni 1980-ikkunilu danmarkimut EF-imullu akerliussutsimik takutitsinerit nunatsinni danmarkimilu pipput, taamanili uanga suli inuunngilanga. 1980-ikkunni aasivinni nunatta siunissaa pillugu oqallinnernut ataatsimoorfiusunut angumersinngilanga. Tamannalu pillugu isumaliortarpunga peqataaneq qanoq misigisimanarnersoq. Qaammatinili ukunani kingullerni misigissuseq inuit taamani pigisaat misigalugu misigaanga.
Akerliussutsimik takutitsinermi nammineq kajumissusera atorlugu assiliisinnaanersunga aperineqarama ingerlaannaq angerpunga. Pisoqarfinni inunnik assiliineq misilittagaqarfigilluarakku qularinngereerpara assilisassakka pissanganartumik oqaluttuarsinnaassasut.
Assini inuit ulluinnarni oqallinnerni peqataasanngikkaluit allatut akerliunertik takutissallugu periarfissinneqarput. Tassa allagartat atorlugit, kiinnatik takutillugit, peqataanertik malugitillugu, akerliunertik oqaasinngorpallaanngikkaluarlugu takutippaat, taannalu tassa akerliussutsimik takutitsinerup anersaava annerpaaq.
Inuit ernumallutik pisut akerliussutsimik takutitsinermi inoqatigik ataatsimooqatiginerminni qiimmaallallutik, sapiinnerulerlutillu USA-mut naaggaarnertik sakkortuumik oqariartuuteqarfigaat. Taakkulu assit nunarsuatsinni tusagassiuteqarfippassuarnut takuteriaannanngorlugit tunniuppakka, qularinngilara aamma USA-mut anngunneri, USA-milu Donald Trumpimut tapersersuisut uppernarsarluarlugu takusinnaanngorpaat, nunatsinni inuppassuit USA-mut ilanngussaanissaannut akerliunerit qanoq annertutiginera. Assit uku tassa uppernarsaasuupput avaqqunneqarsinnaanngitsut.
