Adobe Max 2023 qaangiummat ukioq ataaseq ingerlareersoq Adobe Max 2024 Miamimi kisimiillunga peqataaffigaara.
Ueralunga sukataarlunga aningaasanik tapiisinnaasumik iluatsitsigama peqataanissara qulakkeereerlugu ulluni pingasuni aasit Adobe Max atorluarlugu peqataaffigaara.
Nunatsinni Tusagassiuinermi Sulisut Peqatigiiffiat ugguuna aamma qujaffigivara, Miamimut aqqutaa najugassakkalu aningaasartuutai tapiiffigimmagit.
Miamimi Adobe Max pinngilaarnerani Floridami anorersuarujussuaq atugarliortitsivoq. Aallassanerlunga pissangaqalunga ullut kisippakka, qujanartumilli anorersuarujussuup Miami aqqusaanngimmagu aqqutissara ajunngilaq. Atlantap mittarfissua aqqusaareerlugu miamip avannaatungaanut unnukkut tikikkama sivisuumik Uberinut ilaallunga Miami Beachimi najugassara ornippara. Hotelissannut Española Way-imiittumut iserterama kinguninngua innarpunga, aqaguani ullaaralaakkut bussinut ilaallunga Floridap kujasinnerpaataa qeqertarpassut Key West takornariafigissallugu.
Siniga amigalaartoq soqutiginagu ullaaralaakkut Miami Beach illorsui akulloqqualullugit bussinut ikiffissara ornippara. Illoqarfiup qullerpassui neoninik ikumasut assut alutorsaatigalugit pisuppunga. Misigaanga 80-ikkunni miamimi filmilianut pulasuusillunga. Bussinut ikereerlunga taannaqalimi kujammut biililerpugut. Taamalu sivisutigisumik timmisartornikuutigalunga aamma tassa akunnerit sisamat bussertussanngorpunga. Naammagittaqalungali atorpara, aqqutaanimi aligatoreqarfiit kuukkooriaqarfiillu qeqertaq aqqusaartoratsigit. Qeqertarpassuit aamma illuliorfigineqarsimasut alutornaqimmata silammut itsuanngitsoorsinnaananngilaq.
Key West isorpiaa tikikkatsigu akunnerit arfinillit nammineertussanngorama illoqarfik pisuttuarpara. USA-p 1940-kunni Presidenterisimasaa Harry S. Trumanip ukiumi najugaqarfia silataaniit takornarpara, illoqarfiullu caféerpassui pisiniarfippassuilu isillattaallugit. Key West sioqqanik sissaqarpianngitsup sissatuaasa ilai aamma takornarpakka, USA-llu nunataviata kujasinnerpaaffia inussuusamik nalunaarsugaq angullugu.
Ulloq naalerpamat bussinik Miamimut uteqqippunga. Seqineq tarrilersoq kusanavissumik qeqertarpassui akornatigut takuara. Aqaguani aasit ullaaralaakkut makeriarlunga Adobe Max peqataaffigiartussavara.
Miami Beach Convention Centeriani Adobe Max pisarnermisut pissanganarluinnartumik tamanut saqqummiinertalimmik aallartippoq.
Programmini atortorissaarutit nutaat AI-mik annertuumik sunnikkat uagutsinnut ilisaritinneqarput, ullullu sinnera pikkorissarnerpassuit pillutik.
Ulloq siulleq assiliisartoq pikkorilluinnartoq Los Angelesimeersoq Caroline Tran-ip pikkorissaaneranut peqataavunga. Qaamaneqarluanngikkaluartumik inunnik assiliinissaq pillugu pikkorissarpaatigut, ulluinnarnilu modeliusartut pingasut assilitinnissaannut periarfissilluta. Assiliisartut allat naapillugit, pingaartumik Caroline Tran oqaloqatigalugu assut pissarsiaqarnerpoq.
Ukiup siuliani tusarnaakkama ilaat New Zealandimeertup Kristy Campbell-ip nammineq suliffeqarfiuteqarluni grafikeritut/ilusilersuisartutut suleriaasini, brandinngeriaasinilu pillugu pissarsiaqarnavissumik saqqummiivoq. Oqariartuutai puigunngisakka ulloq manna tikillugu eqqaajuarpakka, tassalu uku:
- Immikkuullarissutsit atorlugu suliaqarit
- Suliatit inunnut takutikkit puigunaallisillugit
- Misigissutsit atorlugit inunnut attaveqarit
- Sapiissutsit atorlugu suliffeqarfippit sunniinera allisiguk.
Taamatukanneq tuluttuumiit nutsersinnaavakka.
Malunnarpoq miamimi Adobe Maximi silassorissuusiaq AI assut initusoq. Ullutsinnimi atugaaleraluttuinnarnera avaqqussinnaajunnaarparput, suleriaaserpullu AI-mut naleqqussarlugu ingerlanerusussanngorpugut. Massakkut pingaartumik assilerininni AI atortarpara. Tamannali tekniskiuallaassammat itisuumik eqqartornianngilara. Unali erseqqarissumik eqqaarusuppara;
Qujavunga Adobe Maximut peqataaqqikkama. Misigaanga suleriaasissannut aqqutissaq uannut ersarinnerulersoq.
Miami Adobe Max aasit uannut puigugassaagani qaangiuppoq, aqaguanilu ualikkut Miamimii københavnimut uterpunga.
Massakkulli nalornissutigaara qaqugu Adobe Max USA-mi peqataaffigeqqissanerlugu. Massakkummi USA-mi pissutsit uagut pingaartitatsinnut naapertuussinnaanngitsut atuugaalerput, USA-llu presidentiata uagutsinnut pissusaa akuersaagassaanngimmat USA-mi pisunut akulerukkusunngikkallarpunga. Imaassinnaasorli Adobep pisarnermisut Adobe Max nunani allani, soorlu Tokyomi Londinimiluunniit Adobe Max ingerlatilerpagu peqataaqqittunga.
Neriuutigaarali USA-mi pissutsit ilorraap tungaanut aallarumaartut, tikeraanut nuuttunullu politikkiat akeqqersimaarpallaarunnaarluni. Tamannami Adobep pingaartitaanut ilaalluinnarpoq, tassa assigiinngissutsitta iluaqutissartai.
Taamak pisoqassappat qularinngilara Adobe Max peqataaffigeqqikkumaarlugu.
