Oktober 2023 ullut arfinillit Los Angelesimiippunga. Los Angelesiliarninnut peqqutaavoq Adobep aaqqissuussaa, Adobe Max ulluni pingasuni ingerlasoq.
Assiliisartutut, videoliortutut, ilusilersuisutullu sulininni programmit atugarisakka pingaarnerpaat Adobep sanaarivai. Ukiullu tamaasa Adobep Max aaqqissuuttarpaa, nunarsuatsinniit Adobep programmiliarpassuinik atuisut atortorissaarutigut nutaarsiassanik saqqummiiffiginiarlugit, pikkorissorsuaniit pikkorissarniarlugit, alutornartunillu nuannisartinniarlugit.
Inuit 10.000-t sinnerlugit Adobe Maximut peqataapput.
Ulluni siullerni marlunni ullaamiit unnummut pisoqaannavittarpoq. Nalinginnaasumik tamanut saqqummiinerit annertuut aallarniutaasarput naggasiutaallutillu. Akornani pikkorissarfissarpassuit nammineq soqutigisaq aallaavigalugu orneriaannaat ornittarpakka. Aammattaaq Creative Parkeqarpoq, suliffeqarfiit assigiinngitsut tuniniagaat takusinnaallugit, grafikerit tusaamasat naapissinnaallugit, Adobellu programmii nutarsakkat nutaanik atortorissaarutillit misilissinnaallugit.
Los Angelesimi misigisannut annertuumik tupaallappunga. Saqqummiinerni pissatsinnartumik, pikkorissaanerni nutaanik periuusininnartunillu immersorneqarluarama. Tamanna nunatsinni amigaatigisarlugu paasivara, nunatsinnimi ilisimasanik avitseqatigiinneq annikittarmat. Nunarsuatsinniilli peqataajartortorpassuit allat aamma naapinneri assut nuannerpoq. Minnerunngitsumik aamma grafikerit assiliisartullu Instagramimi qangali malinnaaffigisakka naapillugit, assiliseqatigalugit pikkorissarfigalugillu assut alutornarpoq. Qujamasuppunga aamma kammassuakka marluk Cebastian Rosing aamma Minik Falksen-Nielsen peqatigalugit puigunaatsumik misigisaqarama.
Los Angelesimi pisunik assilisannik avitseqatigilaarpassi.
